William Taylor Zelenskıynıñ tışqı siyaset muvafaqiyetlerini alğışladı

uatv
19.11.2019
Foto Facebook ABD Elçiligi

Ukrainada Amerika Birleşken Devletleri meseleleri muvaqqat vekâletlisi William Taylor Volodımır Zelenskıy ve onıñ tışqı siyaset taqımını soñki muvafaqiyetlernen hayırladı.

Resmiy bildirüvni Ukrainada Amerika Birleşken Devletleri Elçiliginiñ matbuat hızmeti yayınladı.

“Deñizciler ve diger siyasiy mabüslerniñ muvafaqiyetli qaytması, Stanıtsâ Luganska, Zolote ve Petrovske qasabalarında quvetlerniñ keri çekilmesi, Rusiye qanunsız surette zapt etken ukrain gemileriniñ qaytaralıması. Bütün bu barışıq ve tınçlıq yolunda belli bir adımlardır. Ukrainler bunen ğururlanmaq kerekler”, – dep saya diplomat.

Bunıñ ile William Taylor, Normand dörtü sammiti ötkerilmesi aqqında bildirüvni alğışladı ve barışıq yolunda ilerilev olacağına ümüt etkenini bildirdi.

“Elbette er vaqıt Ukrainanı bölmege istegenler bar, hususan Rusiye”, – dedi o ve Rusiyeniñ sahte haberlerini diñlememege davet etti.

“Yerli haber vastalarınıñ bazı malümatlarında, sanki prezident taqımınıñ azaları Rusiyege duyğudaşlıq ete ya da çatışmanı sabıq Ukraina prezidenti Petro Poroşenko başladı dep yazıla. Çatışma içün Rusiye cevaplı”, – dep qayd etti o.

Diplomat, Birleşken Devletler Ukrainanıñ Rusiyege qarşı küreşinde ve barışıq yolunda onıñ tarafdarı olğanına inandırdı.

Menba UATV
tarih 19.11.2019
kategoriyalar SİYASET
paylaşmaq
UA|TV top haberleri