Volodımır Baluh aprelniñ 19-na qadar ceza izolâtorında qalacaq

uatv
10.04.2019
Foto Facebook Zair Smedlya

İşğal etilgen Qırımda mahküm etilgen ukrain faali Volodımır Baluh aprelniñ 4-nde Rusiyeniñ Torjok şeerindeki №4 koloniyanıñ ceza izolâtorınayerleştirildi.

Bu aqta Baluhnıñ qız qardaşı Nadejdağa aprelniñ 9-nda koloniyanıñ müdiriyeti bildirdi, dep yaza Qırım aq-uquq qoruyıcı gruppası.

Baluh anda aprelniñ 19-na qadar qalacaq.

Volodımır içün yollanma (aş ve urba) alınmadı, çünki ceza izolâtorında tutulğanlar içün körüşüv ve yollanmalar yasaq etile.

Ceza izolâtorında apisliler sert şartlarda tutıla, olarğa tek ötmek ve suv berile.

Aprelniñ 8-nde Volodımır Baluhnıñ qız qardaşı Nadejdadan aş ve urba qabul etilmedi.

2019 senesi fevralnıñ 3-nde Volodımır Baluh Keriç cezahanesinden Aqmescitke etap etildi. 2019 senesi fevralnıñ 18-nde o Krasnodarğa ketirildi, fevralnıñ 24-nde ise ukrain endi Armavirde edi. Biraz soñra belli oldı ki, martnıñ 7-nde o Voronejnıñ taqiqat tevqifhanesinde edi, martnıñ 10-nda ise Yaroslavlde.

Şimdiki vaqıtta siyasiy mabüs Tver vilâyetindeki Torjok şeeriniñ №4 Tüzetüv cezahanesine buluna.

Qırım mahkemesi Volodımır Baluhnı, sahte ve uydurma qabaatlardan sebep qararnen 5 yıl apis cezasına mahküm etti. Rusiye Federaal Telükesizlik hızmeti esassız Qırım sakinini patronlar saqlap tutuvda ve tevqifhane reberini uruvda qabaatladı. Baluhnıñ imayesi ve uquq qoruyıcılar, o Ukraina tarafdarı olğanından sebep repressiyalar qurbanı olğanını tüşüne.

Menba UATV
tarih 10.04.2019
kategoriyalar KREML MABÜSLERİ
paylaşmaq
UA|TV top haberleri