Ukraina ombudsmenı siyasiy mabüs Cemil Gafarovğa konsulnı yollamağa davet etti

uatv
10.10.2019
Foto Ukrinform-UATV

Ukraina Yuqarı Radasınıñ insan aqları vekâletlisi Lüdmila Denisova Tışqı işler nazirligini, al-azırda Rostovnıñ taqiqat tevqifhanesinde tutulğan ukrain siyasiy mabüsi Cemil Gafarovğa konsulnı yollamağa davet etti.

Bu aqta Lüdmila Denisova ukrain televizion kanallarından birisiniñ yaynında bildirdi, dep haber ete UATV.

“Ukraina Tışqı işler nazirligi seslenip, Gafarovnıñ alını bilmek ve angi tibbiy yardımğa muhtac olğanını añlamaq içün oña konsulnı yollağanını istedim. Oña kerekli tibbiy yardım kösterilmesi içün çalışacaqmız”, – dep ayttı Denisova.

Hatırlatamız: Ekinci Aqmescit “Hizb ut-Tahrir davası” mabüsi Cemil Gafarovğa Rostov-na-Donu şeerinin taqiqat tevqifhanesinde ilâclar berilmey.

Cemil Gafarov üçünci gruppa saqatı, devamlı büyrek ve onen bağlı yürek hastalıqları bar. İlâclarnı qabul etmegenlerinden ğayrı, Gafarovnıñ hastahanege qoymasını da red ettiler.

2019 senesi martnıñ 27-nde Federal telükesizlik hızmeti, Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden “Qırım birdemligi” cemaat birleşmesi faalleriniñ evlerinde kütleviy tintüvler keçirdi. 

Bu dava boyunca 25 qırımtatar qabaatlanıla, 23-yu Rostov-na-Donu, Taganrog ve Şahtı taqiqat tevqifhanelerine çıqarıldı. Raim Ayvazov Aqmescit taqiqat tevqifhanesinde tutula, daa bir kişi – Edem Âyaçikov – ğayıp oldı, bulunğan yeri martnıñ 27-nden berli belli degil.

Menba UATV
tarih 10.10.2019
kategoriyalar KREML MABÜSLERİ
paylaşmaq
UA|TV top haberleri