Ukraina eyyeti OSCE toplaşuvında işini devam etti

uatv
18.09.2019
Foto – Ukrinform-UATV

Ukraina eyyeti Varşavada keçken OSCE toplaşuvına keri qayttı.

Bu aqta Ukraina tış işleri Nazirliginiñ Telegramm-kanalında haber etile.

Bundan evel, sentâbrniñ 17-nde, söz serbestligi mevzusında keçken oturışuvda ukraina tarafı narazılığını bildirip, toplaşuv salonundan çıqıp ketti. Sebep – rusiye teşviqatçıları, şu cemleden, “Krımskaya gazeta” ve “Krımskiy jurnal” neşriyatlarınıñ muarriri Mariya Volkova Qırımnı Rusiyeniñki dep, Kiyev tarafından qamaçav kösterilmesine şikâyet etti.

“Faqat, ortaqlarnen muzakelerden soñ, eyyet eki afta devam etecek oturışuvda işini toqtatmamağa qarar aldı”, – dep, qayd ettiler TİN-de.

Narazılıq neticesinde, Ukrainağa qol tutqanlar da birleşti, dep haber etile tış siyaseti müessisesinde. Böyle areketlerden soñ ABD, Kanada, Gürcistan, İsveçre ve başqa memleketlerniñ vekilleri Ukrainağa qol tutqanlarını bildirdiler.

İnsan aqqlarından er yıllıq OSCE toplaşuvı sentâbrniñ 16-nda başlandı. Eki afta devamında Varşavada insan aqqları meselesi, Rusiye tarafından Ukraina topraqlarınıñ zapt etilmesi ve Qırımda insan aqqlarınıñ bozulması muzakere etilecek.

Menba UATV
tarih 18.09.2019
kategoriyalar SİYASET
paylaşmaq
UA|TV top haberleri