Ukraina, Brexit añlaşması yerine ketirilgen soñ, Büyük Britaniya ile vizasız rejimi tayinlenilecegini bekley, – Pavlo Klimkin

uatv
07.02.2019
Foto Ukrinform-UATV

Ukraina Tışqı işler naziri Pavlo Klimkin, Büyük Britaniya ukrainler içün viza rejimini yımşaqlaştıracağına ümüt ete.

Bu aqta o Amerika Sesine bergen intervyüsinde tarif etti.

Nazir, Büyük Britaniya Avropa Birligi terkibinden çıqqan soñ, Ukraina onıñ vatandaşları içün viza tayin etmege planlaştırmamağanını bildirdi.

Şimdiki vaqıtta, Büyük Britaniya vatandaşları qısqa müddetli seyaatlarnen Ukrainanı serbest ziyaret ete bileler. Ukrainlerge ise, Avropanıñ çoqusı memleketlerinden farqlı olaraq, Büyük Britaniyanı ziyaret etmek içün viza kerek.

Klimkinniñ sözlerine kere, ukrainler içün Büyük Britaniyanıñ viza şartları alâ daa yañıdan baqılacaq bir mevzu olmadı. Amma Kyiv ve Londra temsilcileri şimdiki vaqıtta ticaret munasebetleri aqqındaki añlaşma leyhası üzerinde faal tarzda çalışmaqtalar.

“Dostlarımıznıñ belli bir hassaslığını añlaymız, amma buna baqmadan istegimizge irişecekmiz. Yarın olmasa da, amma yaqın vaqıtta ciddiy bir laflar başlanacaq”, – Ukraina TİN dedi.

Klimkin, Büyük Britaniyada Brexit aqqında munaqaşa, migratsiya meseleleri sebebinden başlanğanına diqqat etti.

Onıñ fikrince, Ukraina ve Büyük Britaniya arasında yımşaq viza rejiminiñ tayinlenilmesi imkânı “daa çoq yıllar evel, Büyük Britaniya içün bu migratsiya meselesi daa öyle ciddiy olmağanında” ğayıp oldı.

Menba Amerika Sesi
tarih 07.02.2019
kategoriyalar SİYASET
paylaşmaq
UA|TV top haberleri