UATV Ankarada öz mühbir noqtasını açtı

Mekleket tışında televizion kanalnıñ artıq ekinci çekiş gruppası çalışa

uatv
07.01.2019

Foto Enver İslâmov

Soñki yıllar Ukraina ve Türkiye arasındaki munasebetler yañı seviyege çıqtı. Şimddiki vaqıtta Türkiye bizim memleketimiz içün emiyetli starategik ortaqtır, Kyiv ve Ankara tez tarzda diplomatik, medeniy munasebetlerni arttıra, turizm inkişaf ettire, Ukrainadan talebeler ve studentler Türkiyede oquy ve tecribelerini paylaşalar.

UATV tış yayınlav televizion kanalınıñ Türkiyedeki mühbir noqtası yanvarnıñ 2-nde çalışmağa başladı ve endi ilk levhalar da azırladı. İhtisaslı taqımnı teşkil etken “Ukrinform” mühbiri Ölga Büdnik ve operator Ediye Kataman – televizion kanal seyircilerine Türkiyedeki ukrainlerniñ ayatından eñ müim ve meraqlı vaqialar, ve memlekette yüz bergen adiseler aqqında malümat azırlay.

Türkiyede UATV-ni Ediye Kataman temsil ete. Qırımdan Türkiyege 2013 senesi universitetke kirgen soñ köçip keldi. Teleçekişlernen Ediye daa mektep çağından başlap oğraşa – Qırımda “Meydan” radiosı, ATR ve “Lâle” televizion kanallarında çalışa edi. Biraz soñra Çehiya ve Felemenk medialarında stajlama keçti, Türkiyeniñ TRT birinci devlet televizion kanalında çalıştı.

Resimde Ediye Kataman

“100 yıl evelsi, Türkiye diplomatik munasebetler qurğanımız ilk memleketlerden biri oldı. Zengin bir ortaq keçmişimiz bar, bu yerde büyük bir qırımtatar ve ukrain diasporası bar. Biz, ukrain kütleviy haber vastalarınıñ temsilcileri olaraq, yerli diaspora ve Ukraina ealisi arasında “kopür” kibimiz. Bizim semetdeşlerimiz yat memlekette olğanlarına baqmadan, öz ananelrini sayıp, hatrında tutıp, olarnı öz ballarına aşlatmağa tırışalar. Jurnalistler olaraq, bunı açıqlamağa, malümat ve haber tarafından yardımımıznı köstermege bizim borcumızdır, – dey Ediye Kataman. – Bunıñ ile bir çoq misaller ketire bilem, ne vaqıt Türkiye yolbaşçıları Ukraina meseleleriniñ çezilüvinde yardım etti. Bu, qırımtatarlar Ahtem Çiygoz ve İlmi Ümerovnıñ azat etilüvi. Episi bunı mediada aydınlatmağa pek müimdir”.

Onıñ sözlerine köre, Ukraina içün müim tarihiy vaqianıñ yaqınlaşuvı köz ögüne alınsa, yani Ukrain Ortodoks kilsesiniñ aftokefalligi, Türkiyede mühbir noqtasınıñ açıluvı ayrı bir emiyetke tüşe.

“Bizim mühbir noqtamız Ankarada. Biz paytahttamız, demek – vaqialarnıñ merkezindemiz. Amma tek bu yerdeki vaqialarnı degil de, Türkiyeniñ diger şeerlerinde olıp keçken adise-vaqialarnı aydınlatmağa qararlaştıramız. Mesafe biz içün emiyetli degil, eñ esası – Türkiye-Ukraina malümat meydanınıñ vaqialarını açıqlamaq”, – dep qayd etti Ediye.

Ediye Kataman, malümat cenki vaqtında, haber vastaları ile bağlı olğan er kim öz boynuna qoşma mesüliet alğanını qayd etti.

“… Men içün, menim işim strategik tarafından qıymetli olğanını bilmek pek müimdir. Men daima ğaye ve maqsat açıq-aydın ifadelengen yerde çalışmağa istey edim. İç bir yerge ketirmeycek yolnen ketmege men içün meraqlı degil. Böyle kibi vaziyetlerde, eñ ufaq qıyınlıq yoldan şaşırta bile. UATV öz ögüne qoyğan missiyaları bütünley menim zenaat talaplarımı qanatlendire. Ve bu maqsatkâr taqımnıñ bir qısmı olmaq pek büyük bir bahttır”, – dep yekünledi Ediye Kataman.

HATIRLATAMIZ: UATV televizion kanalı mekleket tışında ilk öz mühbir noqtasını açtı. Çekiş gruppası artıq Varşavada çalışa.

Menba UATV
tarih 07.01.2019
kategoriyalar TELEKANAL HABERLERİ
paylaşmaq
UA|TV top haberleri