“Skit altını” davası ukrain qanunlarına köre baqılmaq kerek , – Medeniyet nazirligi

uatv
17.07.2019
Foto espreso.tv

“Qırım- Qara deñizde altın bir ada” sergi eksponatlarınıñ keri qaytarılması davası sırf ukrain qanunlarına köre baqılmaq kerek.

Bu aqta, Ukraina Medeniyet naziri Yevgen Nışçuk Amsterdam İstinaf mahkemesi qararını tefsir eterek Facebookta yazdı.

Hatırlatamız, tünevin, iyülniñ 16-nda, Amsterdam İstinaf mahkemesi “skit altını” davasına dair evelki qararını ilan etti ve soñ qarar çıqarılmasını 6-9 ayğa qaldırdı.

“Hatırlatmaq isteyim ki, Ukraina müzeyleri ve Allard Pierson Müzeyi arasında tizilgen muqavelelerge köre, er angi davalar Ukrainada ukrain mahkemesinde baqılmaq kerek. Men, mahkeme buna diqqat etti ve bu sırf Ukraina salâhiyetinde olğanını añladı, dep tahmin ete bilem”,- dep qayd etti Nişçuk.

Bunıñ ile, devletimizniñ pozitsiyası, 2014 senesi olğanı kibi de qalğanını qayd etti – “skit altını” mülkiyet aqqı olğan memleketke, Ukrainağa qaytarılmaq kerek. Devletimiz, mahkemeniñ er angi talabına qoşma malümat bermege azır.

Skitler altını kollektsiyası 2014 senesi Qırımdan Felemenk paytahtındaki arheologik müzeyge sergige çıqarılğan edi. Rusiye Qırımnı qanunsız sürette işğal etken soñ, eksponatlarnı qayda qaytarmaq, kibi sual peyda oldı.

2016 senesi Amsterdam bölge mahkemesi, “skitler altını” Ukrainağa qaytarılmaq kerek, dep qarar çıqardı. Çünki o Ukraina Müzey fondunıñ. Amma qanunsız işal etilgen yarımadanıñ “akimiyeti” buna razı olmadı ve birden qararnı temyiz etti. Kollektsiya taqdiri bugün, Amsterdam İstinaf mahkemesi özüniñ soñ qararını ilân etken soñ belli olacaq.

Menba UATV
tarih 17.07.2019
kategoriyalar QIRIM
paylaşmaq
UA|TV top haberleri