Siyasiy mabüs Nuri Primov kene ceza izolâtorına qapatıldı, – advokat

uatv
03.12.2019
Foto Qırım birdemligi

Rusiyeniñ Mariy El cumhuriyetinden qanunsız surette tutulğan Aqyar “Hizb ut-Tahrir davası” mabüsi Nuri Primov kene ceza izolâtorına qapatıldı.

Bu aqta Qırım. Aqiqatqa advokat Emil Kürbedinov aytıp berdi.

Onıñ aytqanına köre, bu 2019 senesi noyabrniñ 18-nde olğan mahkemeden soñ oldı. Bu oturışta Primov azatlıqqa çıqqan soñ sekiz yıl memuriy nezaret altında qalacaq, dep qarar çıqarıldı.

«Alğan malümatıma köre, mahkemeden soñ kartserde otura. O oturışta halqara uquq aqqında ayttı, aytqanlarını protokolda qayd etmege talap etti, mahkemeni çetleştirmege talap etti. Ve, bilgenime köre, mahkemede çoq laf etkeni içün kartserge oğradı. Ne qadar qalacaq bilmeyim, amma tünevin (dekabrniñ 1-nde) daa anda edi», – dep ayttı Emil Kürbedinov.

Kürbedinovnıñ aytqanına köre, Primovnıñ ceza izolâtorına qapatıluvı tezden apisten çıqacağınen bağlı ola bile.

«Soñki aylar – eñ zor, qoranta içün de öyle. Cezahane hadimleri de bunı añlay. Şu sebepten izolâtorğa ciddiy bir sebepten degil, soñuna qadar baqışlarını qoruğanı içün oğray», – dedi advokat.

2017 senesi sentâbr ayında Rostov-na-Donudaki Şimaliy-Kavkaz bölgesiniñ arbiy mahkemesi Aqyar “Hizb ut-Tahrir davası”nıñ mabüsleri Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm çıqardı.

Oquñız:Nuri Primov muntazam tarzda ceza izolâtorına qapatıla, – mabüsniñ anası.

Джерело Qırım. Aqiqat
дата 03.12.2019
категорії KREML MABÜSLERİ
поділитися
Топ новин на UA|TV