Siyasiy körüşleri ve diniy itiqatları içün 17 yıl sert apis cezası

uatv
05.12.2019
Foto Qırım birdemligi

Bugün, dekabrniñ 5-nde, “Enver Seytosmanovnıñ davası” hususında soñki mahke oturışı olıp keçti. Davanı Rusiyeniñ Rostov-na-Donu şeerindeki Cenübiy okrugınıñ arbiy mahkemesi baqtı.

Bu aqta “Qırım birdemligi” cemaat birleşmesi Facebook saifesinde haber ete.

Sergey Görelov, Nikolay Gülko, Aleksandra Generalovadan ibaret olğan mahkeme kollegiyası qırımtatar Enver Seytosmanovğa 1 yılğa serbestligini sıñırlap 17 yılğa şiddetli rejim tüzetüv cezahanesinde qalmasına üküm çıqardı.

Bu cezanı evel Seytosmanov içün prokuror İgor Nadolinskiy istedi.

Rusiye quvetçileri ağa-qardaş Ernes ve Enver Seytosmanovlarnı 2018 senesi mayısnıñ 10-nda Aqyarnıñ Balıqlava rayonınıñ Tılovoye köyünde tintüvlerden soñ yaqaladı.

Ernesni daa soñra yiberdiler, Enverge ise cinaiy dava açılğanı aqqında haber etildi. Onı Rusiye Ceza Qanunnamesiniñ 205.5 maddesine (terror teşkilâtınıñ faaliyetini teşkil etüv ya da iştirak etüv) köre qabaatladılar.

«Memorial» aq-uquq qoruyıcı merkezi Seytosmanovnı siyasiy mabüs olaraq tanıdı.

Menba UATV
tarih 05.12.2019
kategoriyalar KREML MABÜSLERİ
paylaşmaq
UA|TV top haberleri