Şimdiki vaqıtta Volodımır Baluhnıñ ayatı içün telükeler yoq, – Ahtem Çiygoz
Baluh açlıqnı yañıdan daa başlamadı
Foto Zair Smedlya (Facebook)
Qırımda mahküm etilgen ukrain faali Volodımır Baluh №2 Keriç cezahanesinde bulunıp, açlıqnı yañıdan daa başlamadı. Bu aqta, Qırımtatar Milliy Meclisiniñ reis muavini Ahtem Çiygoz bildirgen, haber ete Qırım.Aqiqat.
“Volodımır Baluhnıñ ayatı içün iç bir telükeler şidiki vaqıtta yoq. Açlıqnı yañıdan daa başlamadı”, – dedi Çiygoz.
Daa evel Baluh açlıqnı vaqtınca toqtatmağa qarar alğan edi. Advokat Dmitriy Dinzeniñ aytqanına köre, 200 künden ziyade açlıq tutqan siyasiy mabüste aşqazan ülseri ve pankreatit olğanına şübe bar.
FSB Volodımır Baluhnı 2016 senesi dekabrniñ 8-nde yaqaladı. Baluhnıñ imayesi ve uquq qoruyıcılar onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi. 2018 senesi martnıñ 19-nda Kreml mabüsi müddetsiz açlıqnı ilân etti. 2018 senesi oktâbrniñ 9-nda açlığını toqtatqanı aqqında bildirdi.
Noyabrniñ 2-nde advokat Dmitriy Dinze ve Aqmescit arhiyepiskopı Kliment Baluhnı ziyaret etip olamadılar, çünki №2 Keriç cezahanesi karantinde buluna.
| Menba | Qırım. Aqiqat |
| tarih | 06.11.2018 |
| kategoriyalar | KREML MABÜSLERİ |
| paylaşmaq |