Rusiye mahkemesi 6 qırımtatarnı sert apis cezasına mahküm etti

uatv
12.11.2019
Foto Qırım. Aqiqat

Bugün, noyabrniñ 12-nde Rostov-na-Donu şeeriniñ Cenübiy bölge arbiy mahkemesi Yalta «Hizb ut-Tahrir dava»nıñ 6 mabüsini sert apis cezasına mahküm etti.

Bu aqta Qırım. Aqiqat haber ete.

Mahkemeniñ qararına köre, Müslim Aliyev – 19 yılğa, İnver Bekirov – 18 yılğa, Emir-Üseyn Kuku – 12 yılğa, Vadim Siruk – 12 yılğa, Arsen Cepparov – 7 yılğa ve Refat Alimov – 8 yılğa mahküm etildi.

Cezalarını mabüsler sert rejim koloniyasında çekecekler.

Qırım sakinlerine destek bildirmek içün mahkeme oturışına 100-den ziyade adam keldi, bunıñ ile mahkemede Amnesty International ükümetke bağlı olmağan halqara teşkilâtınıñ temsilcisi ve Rostov-na-Donudaki Ukraina baş konsulı Taras Malışevskiy bulundı.

Evel Rusiye prokurorı, beraber qoşıp sayğanda, Yalta “Hizb ut-Tahrir dava” mabüsleri içün 98,8 yıl apis cezasını istedi: Muslim Aliyev – 20 yıl, İnver Bekirov – 20,6 yıl, Emir-Üsein Kuku – 15 yıl, Vadim Siruk – 15 yıl, Arsen Cepparov – 13,6 yıl, Refat Alimov – 14,6 yıl.

Bu dava boyunca qabaatlanılğan Arsen Cepparov, Refat Alimov, Emir-Usein Kuku, Müslim Aliyev, İnver Bekirov ve Vadim Siruk 2016 senesi fevral-aprel aylarında Yaltada yaqalanılğan edi. Olar Rusiyede terroristik sayılğan ve yasaq etilgen «Hizb ut-Tahrir» diniy teşkilâtına alâqaları bar olğanınen qabaatlanıldı.

Menba Azatlıq Radiosı
tarih 12.11.2019
kategoriyalar KREML MABÜSLERİ
paylaşmaq
UA|TV top haberleri