Rusiye Federatsiyasındaki aq-uquq qoruyıcı merkezi ukrain deñizcilerini arbiy esirler olaraq tanıdı

uatv
10.04.2019
Foto UATV

“Memorial” aq-uquq qoruyıcı merkezi, 2018 senesi noyabr ayında Keriç boğazı civarında Rusiye Federatsiyası tarafından zapt etilgen 24 ukrain deñizcisini arbiy esirler olaraq tanıdı.

Bu aqta teşkilâtnıñ resmiy saytında yazıla.

Bunıñ ile, “Memorial” merkeziniñ temsilcileri, o zaman olğan vaqialar halqara arbiy çatışuv olğanını da bildire.

Aq-uquq qoruyıcılar apiske alınğan deñizciler arbiy esirler olğanını tasdıqlap, Rusiye akimiyetinden olarğa Üçünci Jeneva şartnamesine köre davranılmasını talap etti. “Memorial” vekilleriniñ fikirince, ukrain arbiyleri Rusiyeniñ deñiz sıñırından keçmedi ve olarnı qabaatlamaq içün sebep yoq.

“Halqara gumanitar uquqqa köre, deñizciler ve zabitler apiske alığan tarafnıñ ceza qanunnamesine köre mahkeme etilmez. Olarğa Üçünci Jeneva şartnamesine köre davranılmaq kerek”, – yazıla vesiqada.

BMT insan aqları yuqarı komissarınıñ idaresi azırlağan maruzada aytılğanına köre, deñizciler cenk esiri olaraq tanılmalı.

Noyabrniñ 25-nde, Keriç boğazı yanında rusiye mahsus hızmetleri Odessa limanından Azaq deñizi boyu Mariupol limanına yol tutqan Ukrainanıñ “Berdânsk” ve “Nikopol” katerlerine ve “Yañı Qapu” reyd buksirine ücüm etip, olarnı zapt etti. Ukrain deñizcileri endi 4 ay devamında rusiye esirindeler. Moskvadaki mahkeme olarnı aprelniñ soñuna qadar tevqifke aldı.

Menba UATV
tarih 10.04.2019
kategoriyalar KREML MABÜSLERİ
paylaşmaq
UA|TV top haberleri