Rusiye Federatsiyası qırımtatar faali Edem Bekirovnı deral hastahanege yatqızmaq kerek, – AİAM qararı

uatv
12.06.2019
Foto Facebook Anton Naumliuk

İyunniñ 11-nde, Avropa insan aqları mahkemesi Qırımda silâ ve patlayıcı maddelerni saqlamasınen qabaatlanğan qırımtatar faali Edem Bekirovnıñ davasına dair qarar çıqardı. Mahkeme onıñ hastahanege acele yatqızılmasını talap etti.

Bu aqta Qırım. Aqiqat haber ete.

Edem Bekirovnıñ advokatı İslâm Velilâyevniñ aytqanına köre, “bu qarar beklenilmegen, amma bu vaziyette tamamen doğru ola”.

“Men advokat olaraq bu qararnı Edem ağa Bekirovnıñ davasınen oğraşqan tahqiqatçığa ve Rusiyeniñ İnsan aqları vekâletlisi Tatyana Moskalkovağa yollaycam. Tahqiqatçı seslenmese, men mahkemege muracaat etmege mecbur olacam. Yarım yıldan berli advokatlar müvekkilimiz taqiqat tevqifhanesinde öle, dep ayta. Ve er kün müim”, – dep ayttı advokat.

Edem Bekirovğa nisbeten qullanılğan Avropa insan aqları mahkemesi reglamentiniñ 39-ıncı qaidesine binaen, Rusiye akimiyeti onı apishanege ait olmağan hastahanege acele yatqızmağa mecbur.

Aqmescit mahkemesi Edem Bekirovnıñ apis cezasını daa eki ayğa uzattı. O, avgustnıñ 12-ne qadar taqiqat tevqifhanesinde qalacaq.

Rusiye tahqiqatçısı ise Edem Bekirovğa qabaatını tanıp, taqiqat tevqifhanesinde qaluv sıñırlav tedbiri yerine ev apsine ketmege teklif ete.

HATIRLATAMIZ: 58 yaşlı Edem Bekirov birinci gruppa saqatı. Ayağı tızından aşağı taba kesip alındı, şeker ve daa bir qaç diger ağır hastalığı bar. Dekabrniñ 12-nde, Edem Bekirov qanunsız sürette işğal etilgen Qırım kirişinde Rusiyeniñ mahsus hızmetleri tarafından tutuldı. Qırımğa o, 78 yaşındaki anasını ve aqrabalarını ziyaret etmek içün yol tuta edi. O silâ ve patlayıcı maddeler saqlamasınen qabaatlana.

Menba Qırım. Aqiqat
tarih 12.06.2019
kategoriyalar KREML MABÜSLERİ
paylaşmaq
UA|TV top haberleri