Refat Çubarov uzun müddet apis cezasına mahküm etilgen qırımtatarlarğa qoltutmağa davet etti

uatv
08.07.2019
Foto Ukrinform-UATV

Qırımtatar Milliy Meclis reisi Refat Çubarov, rusiyeli aq-uquq qoruyıcılarnı, faallerni ve diplomatlarnı iyülniñ 11-nde Rusiyeniñ Yuqarı mahkemesi binası yanına kelip, uzun müddet apis cezasına mahküm etilgen qırımtatarlar –Zevri Abseitov, Remzi Memetov, Rustem Abiltarov ve Enver Mamutovğa qoltutmağa davet etti.

Bu aqta Refat Çubarov öz Facebook saifesinde yazdı.

“Rusiye vatandaşları ve söz serbestligini qorçalamağa tırışqan, demokratik printsipleri ve azatlıq tarafdarları olğan rusiyeli aq-uquq qoruyıcılarnı ve jurnalistlerni, çetel diplomatlarnı ve Moskvada akkreditatsiya etilgen halqara missiyalar hadimlerini 2019 senesi iyülniñ 11-nde saat 9:30 Rusiye Federatsiyası Yuqarı mahkemesi binası yanına kelmege davet etem”, – yazdı Refat Çubarov.

İyülniñ 11-nde Rusiyeniñ Yuqarı mahkemesi Şimaliy-Kavkaz bölgesi arbiy mahkemesiniñ ükmüne berilgen istinaf baqacaq.

2016 senesi mayısnıñ 12-de Bağçasarayda Rusiye telükesizlik hadimleri musulmanlar, qırımtatarlarnıñ evlerinde ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorcılıqta qabaatlanıldı. Olar, Rusiyede terrorcı sayılğan ve yasaq etilgen “Hizb ut-Tahrir” diniy teşkilâtınıñ işinde iştirak etüvnen şübheli sayıla.

2018 senesi dekabr ayında Şimaliy-Kavkaz bölgesiniñ arbiy mahkemesi Enver Mamutov 17 yıl sert apis cezasına mahküm etildi, Ruslan Abiltarov, Remzi Memetov ve Zevri Abseitov ise 9 yıl sert apis cezasına. Mabüslerden iç birisi qabaatını tanımadı. Olar cinaiy işniñ “siyasiy sebepleri bar”, dep qayd etti.

Menba UATV
tarih 08.07.2019
kategoriyalar QIRIM
paylaşmaq
UA|TV top haberleri