Qırımtatar boksçusı Artur Ziyatdinov nevbetiy ğalebesini elde etti

uatv
19.03.2019
Foto Qırım. Aqiqat

Qırımtatar boksçusı Artur Ziyatdinov nevbetiy ihtisasiy uruşını yuttı.

Uruş martnıñ 16-nda Kanadanıñ Monreal şeerinde olıp keçti. Bu endi onıñ 9-ncı ğalebesi. Doquz uruştan 8-ni nakaut etip bitirdi.

Bu sefer onıñ raqibı leh Maykl Lüdviçek edi. Uruşnıñ başından Artur öz raqibinden eyice areket etti, ve endi 4-ci raundda akem uruşnı toqtatmağa mecbur oldı.

Uruşqa Artur er vaqıt olğanı kibi qırımtatar timsalyatlı urba kiydi. Böylece o er sefer asıllı kim olğanını bildire.

İhtisasiy boksnen 2017 senesinden başlap oğraşa. Bu vaqıt devamında bir kerede yutquzmadı.

Keçken sene Artur Ziyatdinov ağır çekideki Dünya boksçular cedveliniñ ilk 100-ne kirdi.

Menba UATV
tarih 19.03.2019
kategoriyalar Sport
paylaşmaq
UA|TV top haberleri