Qırımdaki mahkeme qırımtatar faali Edem Bekirovnıñ davasını toqtattı

uatv
07.10.2019
Foto UATV


Oktâbrniñ 7-nde, Rusiye idaresi astındaki Aqmescitniñ Merkeziy rayon mahkemesi, Ukraina ve Rusiye arasında olıp keçken deñişüv vaqtında azat etilgen ve bugünge qadar Kyivde bulunğan qırımtatar faali Edem Bekirovnıñ davası hususında tahqiqatnı toqtattı.

Bu aqta Qırım.Aqiqatqa advokat Aleksey Ladin aytıp berdi.

Advokatnıñ aytqanına köre, cinayet davasını qapatmağa muracaatnı prokuror bergen, çünki şimdilik Bekirov hastalıqları ve daimiy tedaviylev sebebinden mahkeme oturışlarında iştirak etip olamay. Mahkemeci Sergey Demenov qabaatlav tarafınıñ muracaatına qoltuttı.

“Mahkeme, mahküm Bekirovnıñ mahkemede iştirak etmesine keder etken ağır sağlıq alı sebebinden davası hususında tahqiqat toqtatmaqnı kerekli, dep saya”, – dep yazıla mahkeme qararında.

Aleksey Ladinniñ bildirgenine köre, mahkeme qararına binaen, dava hususında mahkeme oturışıları Edem Bekirov sağlığını tüzetmegence olmaycaq.

HATIRLATAMIZ: 58 yaşlı Edem Bekirov birinci gruppa saqatı. Ayağı tızından aşağı taba kesip alınğan, şeker ve daa bir qaç diger ağır hastalığı bar. 2018 senesi dekabrniñ 12-nde, Edem Bekirov qanunsız sürette işğal etilgen Qırım kirişinde Rusiyeniñ mahsus hızmetleri tarafından tutuldı. Qırımğa o, 78 yaşındaki anasını ve aqrabalarını ziyaret etmek içün yol tuta edi. O silâ ve patlayıcı maddeler saqlamasınen qabaatlana. Sentâbrniñ 7-nde Ukraina ve Rusiye arasında olıp keçken büyük deñişüv çerçivesinde azat etildi.

Menba Qırım. Aqiqat
tarih 07.10.2019
kategoriyalar KREML MABÜSLERİ
paylaşmaq
UA|TV top haberleri