Qırımda yaqalanğan faaller Kreml mabüslerine yardım ete edi, – Ombudsmen

uatv
27.03.2019
Foto Facebook Lüdmila Denisova

Bugün, martnıñ 27-nde işğal etilgen Qırımda Rusiye telükesizilik hızmeti hadimleri qırımtatarlarnıñ evlerinde tintüvler keçire. Ukraina Yuqarı Şurası insan aqları vekâletlisi Lüdmila Denisova, “Qırım birdemligi” cemaat birleşmesi azaları ve diger cemaat faallerniñ evlerinde sebep ve izaat olmadan tintüv areketleri keçirilgenini bildirdi.

Bu aqta o öz Facebook saifesinde yazdı.

“Tahqiqat tedbirleri Remzi Bekirov, Osman Arifmemetov, Rustem Şeyhaliyev, Erfan Osmanov, Aziz Bekirov, Akim Bekirov, Abdulaziz Ümerov, Mecit Abdurahmanov, Tofik Abdulgaziyev, Yaşar Muyedinov, Seitveli Seytabdiyev, Edem Yaçikovnıñ evinde keçirile”, – dep yazdı Ombudsmen.

Onıñ sözlerine köre, bu faaller Rostov-na-Donudaki mahkeme oturışlarına barğan – ukrain siyasiy mabüslerini ziyaret ete ve kerekli şeyler ketire edi.

Lüdmila Denisova, tintüvler devam etkenini ve yaqalanğan kişilerniñ sayısı ziyade ola bilecegini qayd etti.

Evel, faallerniñ bildirgenine köre, Boğurça (Kamenka) qasabasında tintüvler keçirilgen maalleni Rusiye gvardiyası qapattı. Yerli sakinlerni evlerine yibermeyler.

Bunıñ ile Aqmescitteki Boğurça (Kamenka) qasabasında Rusiye quvetçileri yerli sakin Rustem Şeyhaliyevniñ evi yanında bir qaç insannı tuttı. Qasabanı sarıp alğan Rusiye İçki işler nazirliginiñ hadimleri sakinlerni dağılmağa çağırdı. Red cevabı berilgen soñ ise kötek çıqtı, neticede eki insan tutuldı. Olarnıñ soyadları belli degil.

Menba UATV
tarih 27.03.2019
kategoriyalar CEMİYET
paylaşmaq
UA|TV top haberleri