Prezident ofisinde Vışinskiyni Sentsovğa deñiştirmege teklif etildi

uatv
19.07.2019
Foto president.gov.ua

Prezident ofisinde, “yahşı niyetniñ ilk adımı” olaraq, “RİA Novosti-Ukraina” baş muarriri Kirill Vışinskiyniñ azat etilüvi aqqında Rusiyeniñ teklifine cevap berildi.

Bu aqta Facebookta, Volodımır Zelenskıynıñ matbuat kâtibi Yuliya Mendel yazdı.

“Prezidentniñ ofisi Ukraina tarafından eyi niyetniñ ilk adımı olaraq Rusiye Federatsiyasınıñ Kirill Vışinskiyniñ azat etilüvi teklifine büyük meraqnen yanaştı. Eyi niyet adımlarınıñ siyasetine tolusınen qoltutıp, Rusiyege de adım atmağa – Oleg Sentsovnı azat etmege teklif etemiz. Yahşı niyetlerimizden emin olmaq içün bunı aynı vaqıtta yapmağa teklif etemiz”, – dep yazdı Mendel.

Prezident ofisinde, Oleg Sentsovnı ve Kirill Vışinskiyni aynı vaqıtta azat etmege teklif etildi.

HATIRLATAMIZ: Rusiye prezidenti matbuat kâtibi Dmitriy Peskov, Ukrainada devlet hainliginen qabaatlanılğan Kirill Vışinskiyniñ azat etilüvini “Rusiye-Ukraina munasebetleriniñ eyileştirilmesine doğru, eyi bir adım” olaraq adlandırdı.

“RİA Novosti-Ukraina” baş muarriri Kirill Vışinskiy 2018 senesi mayısnıñ 15-nde Kyivde devlet hainliginen (Ceza qanunnamesi 111-inci maddesi) şübheli sayılıp, tutulğan edi. Eki künden soñ apiske alındı ve bugünge qadar taqiqat tevqifhanesinde buluna.

Qırımlı rejissör Oleg Sentsov ve anarhist Оleksandr Kölçenko Rusiye mahsus hızmetleriniñ vekilleri tarafından Qırımda 2014 senesi mayıs ayında, yarımadada terror eylemlerine azırlıqnen qabaatlanılıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırımda terrorcı faaliyetnen qabaatlap, 20 yıl şiddetli apis cezasına mahküm etti. Oleg Sentsov Rusiye şimalindeki Labıtnangi şeerinde apiste yata.

Menba UATV
tarih 19.07.2019
kategoriyalar SİYASET
paylaşmaq
UA|TV top haberleri