New-York’ta qırımtatarlarnıñ sürgünligine bağışlanğan fotosergi açıldı

uatv
05.05.2019

Cumaertesi künü, mayısnıñ 4-nde, ABD-de “75 yıldan soñra qırımtatarlarnıñ sürgünligi” degen sergi açıldı. Bu aqta Ukrinform haber etmekte.

Sürgünlik qurbanlarınıñ fotosüretleri Nyü-Yorktaki Ukrain müzeyinde yerleştirildi.

“Bu qıyın ikâyeni tamam bu şekilde, yani balalıqta sürgünlikten keçken insanlarnıñ portretleri vastasınen köstermege ğaye peyda oldı”, – dep, ikâye etti ğaye müellifi Sevgil Musayeva.

Sürgünlik şaatlarınıñ portretlerini 2019 senesi mart ayında qırımtatar fotografçısı Zarema Yalıboylü yapqan.

“Tamam bu maqsatnen o, Qırımğa kelip, eki afta foto çıqarğan. Onıñ ziyareti qırımtatarlarğa qarşı yañı repressiyalar maaline tüşti. Olarnıñ episi, em yaşlar, em qartlar buña pek qasevetlene. Atta bu portretlerge baqıp, olarnıñ ğamını ve ağırısını körebilesiñiz”, – dep, añlattı Musayeva.

New-Yorkta sergi sentâbr ayınace devam etecek. Bundan ğayrı, sergi Kanada, soñra da Kiyevde planlaştırıla.

“Şimdi qırımtatarlar yañıdan Qırımdan çıqmağa mecbur. Yaşlarğa ve Meclis azalarına qarşı repressiyalar, siyasiy basqı yüzünden. Bu pek kederli. Sürgünlikniñ 75 yıllığı arfesinde qırımtatarlarnıñ faciası qaytarıla bile”, – dep yekünledi Sevgil Musayeva.

1944 senesi mayıs 18-21 künleri sovet akimiyeti qırımtatar halqını tarihiy vatanı Qırımdan Orta Asiya ve Ural civarlarına sürgün etti. Qırımtatarlar tek 1990-cı seneleri Vatanğa qaytıp oldı.

Hatırlatamız, RF quvetlçileri qırımtatar faalleriniñ evlerinde yañı tintüvler keçirdi.

Menba UATV
tarih 05.05.2019
kategoriyalar UKRAİNA DÜNYADA
paylaşmaq
UA|TV top haberleri