Nobel mukâfatınıñ kimiyadan laureatları belli oldı

uatv
09.10.2019
Foto Twitter NobelPrize

Bugün, oktâbrniñ 9-ndа, Nobel mukâfatınıñ kimiyadan laureatları ilân etildi. Mukâfat Con B. Güden, M. Stenli Uittingem ve Akiri Yoşinoğa berildi.

Bu aqta UATV mukâfatnıñ Twitter saifesine atfı etip bildire.

“2019 senesi Nobel mukâfatınıñ kimiyadan laureatları Con B. Güden, M. Stenli Uittingem ve Akiri Yoşinoğa litiy-ion akkumulâtorlar işlep çıqarıluvı içün berildi.”, – yazıla malümatta.

2019 senesi Nobel mukâfatınıñ fizikadan laureatı fizikiy kosmologiya saasındaki tetqiqi içün Ceyms Pibls ve küneş tipi bir yıldız etrafında aylanğan ekzotik seyyare saasındaki keşif içün Mişel Mayor ve Didye Kvelotsqa beridi.

Tibbiyet ve fiziologiyadan Nobel mukâfatını üç alim: Vilyam Keylin, Piter Retkliff ve Greg Sementsa aldı. Mukâfat, üzviyet üceyreleriniñ oksigen mevcudiyetine reaktsiyası saasındaki tetqiqat içün berildi.

Alimler 900 biñ dollar alacaq. Keçken sene tibbiyet saasında mukâfatnı amerikalı Ceyms Allison ve yapon Tasuku Hondzö aldı.

Bu afta daa edebiyat, iqtisadiyat saalarında mukâfatlar berilmek kerek. Cuma künü ise Barışıq Nobel mukâfatı saibi ilân etilecek. Berilgen malümatka köre, onı isveç ekologiya faali Greta Tunberg ala bile.

Ğaliplerniñ resmiy mâkâfatlanuv merasimi dekabrniñ 10-nda, mukâfat tesisçisi Alfred Nobelniñ ölüm kününde olacaq.

Menba UATV
tarih 09.10.2019
kategoriyalar İLİM
paylaşmaq
UA|TV top haberleri