MSK prezident saylavlarınıñ ekinci turı olacağı aqqında resmiy tarzda bildirdi

uatv
01.04.2019
Foto AР

Merkeziy saylav komissiyasınıñ reisi Tatyana Slipaçuk brifing vaqtında prezident saylavlarınıñ ekinci turı olacağı aqqında bildirdi.

Onıñ sözlerine köre, yerli saylav komissiyalarından protokollarnıñ 60 faizi berilgen soñ, saylavlarnıñ birinci basamağında ğalebe qazanmaq içün kerek olğan 50 faizden ziyade rey iç bir namzet almağanı malüm oldı.

“Qayd etem ki, saylavlarnıñ ekinci turı olacaq. MSK ögünde ciddiy bir vazife bar, çünki reylerniñ soñ neticeleri ilân etilgeni ve aprelniñ 21-ne tayin etilgen ekinci tur arasında pek qısqa müddet”, – dedi o.

Saat 11:40 köre protokollarnıñ 67,82 faizi endi işlendi. MSK-nıñ malümatına köre, Volodımır Zelenskıy – 30,45%, Petro Poroşenko – 16,22%, Yuliya Tımoşenko – 13,10%, reylerni alğan.

Merkeziy saylav komissiyasınıñ malümatına köre saylavlar vaqtında sistema bozuvları olmadı, 199-dan 10 saylav bölgesiniñ esabatına esaslanaraq, adam kelüvi 66,8 %-nı teşkil etti.

Martnıñ 31-nde Ukrainada prezident saylavları ötkerilmekte. Saylav bölükleri öz işini saba saat 8:00-de başladı ve aqşam 20:00-de toqtattı. Bu sene saylavlarda devlet başı vazifesi içün 39 namzet küreşti.

Merkeziy saylav komissiya, saylav neticelerini aprelniñ 10-unace ilân etmek kerek. Saylavnıñ birinci basamağında ğalebe qazanmaq içün namzet 50%-dan ziyade rey almaq kerek. Öyle birisi olmasa, saylavnıñ ekinci basamağı aprelniñ 21-inde keçirilecek.

Menba UATV
tarih 01.04.2019
kategoriyalar CEMİYET
paylaşmaq
UA|TV top haberleri