Moskvada narazılıq aktsiyası: 7 qırımtatar tutıp alındı

uatv
10.07.2019
Foto Facebook Saşa Krılenkova

Bugün, iyülniñ 10-nda saat 11:00, Moskvada Qızıl meydanda, işğal etilgen Qırımda qırımtatarlarnıñ taqip etilüvine qarşı narazılıq aktsiyası başlandı. Narazılıq başlağanındаn bir qaç daqqa soñra Rusiye polisi 7 qırımtatarnı tutıp aldı.

Bu aqta ATR rusiyeli aq-uquq qoruyıcı Aleksandra Krılenkoğa atfı etip bildire.

“Tam şimdi Qızıl meydanda”, – dep yazdı fotoresim astında Aleksandra Krılenko.

Malüm olğanı kibi, bugün iyülniñ 10-nda saat 15:00 Moskvada, Moskva Helsinki Gruppası binasında matbuat konferentsiyası keçirilecek. Anda advokatlar, aq-uquq qoruyıcalavr ve soy-soyplar birinci “Hizb ut-Tahrir davası” mabüsleri aqqında tarif etecekler.

İyülniñ 11-nde Rusiyeniñ Yuqarı mahkemesi Şimaliy-Kavkaz bölgesi arbiy mahkemesiniñ ükmüne berilgen istinaf baqacaq.

2016 senesi mayısnıñ 12-de Bağçasarayda Rusiye telükesizlik hadimleri musulmanlar, qırımtatarlarnıñ evlerinde ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorcılıqta qabaatlanıldı. Olar, Rusiyede terrorcı sayılğan ve yasaq etilgen “Hizb ut-Tahrir” diniy teşkilâtınıñ işinde iştirak etüvnen şübheli sayıla.

2018 senesi dekabr ayında Şimaliy-Kavkaz bölgesiniñ arbiy mahkemesi Enver Mamutovnı 17 yıl sert apis cezasına mahküm etti, Ruslan Abiltarov, Remzi Memetov ve Zevri Abseitovnı 9 yıl sert apis cezasına. Mabüslerden iç birisi qabaatını tanımadı. Olar cinaiy işniñ “siyasiy sebepleri bar”, dep qayd etti.

Menba UATV
tarih 10.07.2019
kategoriyalar CEMİYET
paylaşmaq
UA|TV top haberleri