“Memorial” aq-uquq qoruyıcı merkiz beş qırımtatarnı siyasiy mabüs olaraq tanıdı

uatv
17.07.2019
Foto Qırım birdemligi

“Memorial” aq-uquq qoruyıcı merkez, Rusiyede terrorcı sayılğan ve yasaq etilgen “Hizb ut-Tahrir” diniy teşkilâtınıñ işinde iştirak etüvnen qabaatlanıp, apis cezasına mahküm etilgen beş qırımtatarnı siyasiy mabüs olaraq tanıdı.

Böyle bir malümat iyülniñ 17-nde merkezniñ saytında derc etildi, dep haber ete Radio Svoboda.

Aq-uquq qoruyıcılar Teymur Abdullayev, Üzeir Abdullayev, Rustem İsmailov, Emil Cemadenov ve Ayder Saledinovnıñ tez vaqıtta azat etilmesini talap ete.

“Qırımtatarlar tek musulman teşkilâtınıñ azaları olğanı içün qabaatlı oldı”, – dep qayd ete aq-uquq qoruyıcılar

“Memorial” “Hizb ut-Tahrirniñ” terrorcı teşkilât olaraq ilân etilmesini qanunsız dep saya.

“Rusiye – onı böyle etir tanığan dünyanıñ yekâne memleketidir. Ukrainada ve çoqusı Avropa memleketlerinde yasaq etilmegen “Hizb ut-Tahrir” davaları mevzusında, işğal etilgen Qırımda 2014 senesinden başlap aman-aman 70 insan apiske alındı”, – dep yazıla merkezniñ haberinde.

Beş qırımtatar, 2016 senesi oktâbr ayında evlerinde keçirilgen tintüvlerden soñ tutulğan edi. Rusiyede terrorcı sayılğan ve yasaq etilgen “Hizb ut-Tahrir” diniy teşkilâtınıñ işinde iştirak etüvnen qabaatlanıldı.

Mahkeme olarğa 12-den 17 yılğa qadar apis cezasına üküm çıqardı.

Menba Azatlıq Radiosı
tarih 17.07.2019
kategoriyalar KREML MABÜSLERİ
paylaşmaq
UA|TV top haberleri