Mariupolde, memlekette idariy hızmetlerni eda etken eñ büyük merkez açılacaq (FOTO)

Fiyatı 100 million grivnadan ziyade

uatv
01.11.2018

Foto mariupolrada.gov.ua

Mariupolde, Ukrainada idariy hızmetlerni idare etecek eñ büyük merkez – “Multimerkez” qurula. Leyhanıñ fiyatı, etrafnıñ abadanlaşuvı ile, 100 million grivnadan ziyadedir. Bu aqta Mariupol şeer şurasında haber etildi.

Qayd etile ki, qurucılıqqa Mıntaqaviy inkişafı devlet fondundan 28 million grivna ayırılğan edi. Daa 10 million grivnadan ziyade paranı Metinvest Gruppası yatırdı, qalğan paralar – yerli bücetten alındı.

Merkezniñ tehnikiy donatıluvınen ABD-niñ Halqara inkişafı agentligi (USAID) oğraşa. Şimdiki vaqıtta tam olaraq merdivenler quruluşı yekünlendi, 95 faizge – demontaj işleri ve 50 faizge – tış ve içki divarlar. Biraz soñra, dam deñiştirilüvi bitirilecek ve etrafnıñ abadanlaştırıluvı yapılacaq.

Mariupol şeeriniñ başı Vadim Boyçenko, merkez Ukrainada eñ büyük olacağını ve tahminen 120 yañı iş yerinen teminleycegini qayd etti.

“Multimerkez” idariy, kommunal, içtimaiy ve pension hızmetlernen teminleycek. Bundan ğayrı binada ZAGS yerleşecek. Merkezniñ damında közetüv meydançığı leyhanıñ üstünligi olacaq. O yerden yañartılğan “Kok quşağı” (“Raduga”) parkına manzara açılacaq.

Menba UATV
tarih 01.11.2018
kategoriyalar CEMİYET
paylaşmaq
UA|TV top haberleri