Kyivde Rusiye Federatsiyası Elçiligi yanında qırımtatarlarğa qoltutmaq içün aktsiya keçirildi

uatv
11.07.2019
Foto Qırım birdemligi

Kyivde, Rusiye Elçiligi yanında narazılıq aktsiyası olıp keçti. Sebep, iyülniñ 11-ne planlaştırılğan, dört qırımtatarğa dair “terrorcılıq degen davası” mevzusında istinaf şikâyetiniñ baquluvı oldı.

Bu aqta ATR saytında haber etile.

“Biz, bu yerde, qırımtatarlarğa yapılğan basqılarğa kene de “yoq” aytmaq içün toplaştıq. Biz, bütün dünyağa, yer yüzünde yüregi düküldegen bir qırımtatar olğance, küreşimiz devam edetegini bildirmek içün toplaştıq”, – dedi müfti Ayder Rustemov.

Şimdi mahkeme binası yanında 100-den ziyade faal qarar ilân etilüvini beklemekte. Olar “Qırımda basqılarnı toqtatıñız” yazılı futbolkalarğa kiyingen. Qollarında plakatlar: “Bizim ballarımız terrorcılar degil”. Bina yanında nevbet etken polis faallerge plakatlarnı cyıştırmağa ve futbolkalarnı çıqarmağa rica etti.

İyülniñ 11-nde Rusiyeniñ Yuqarı mahkemesi Şimaliy-Kavkaz bölgesi arbiy mahkemesiniñ ükmüne berilgen istinaf baqacaq.

2016 senesi mayısnıñ 12-de Bağçasarayda Rusiye telükesizlik hadimleri musulmanlar, qırımtatarlarnıñ evlerinde ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorcılıqta qabaatlanıldı. Olar, Rusiyede terrorcı sayılğan ve yasaq etilgen “Hizb ut-Tahrir” diniy teşkilâtınıñ işinde iştirak etüvnen şübheli sayıla.

2018 senesi dekabr ayında Şimaliy-Kavkaz bölgesiniñ arbiy mahkemesi Enver Mamutovnı 17 yıl sert apis cezasına mahküm etti, Ruslan Abiltarov, Remzi Memetov ve Zevri Abseitov ise 9 yıl sert apis cezasına. Mabüslerden iç birisi qabaatını tanımadı. Olar cinaiy işniñ “siyasiy sebepleri bar”, dep qayd etti.

Menba UATV
tarih 11.07.2019
kategoriyalar CEMİYET
paylaşmaq
UA|TV top haberleri