İyülniñ 5-nde Refat Çubarovnıñ 5 yıllıq Qırımğa kirme yasağı soñuna keldi

uatv
05.07.2019
Foto Qırım. Aqiqat

İyülniñ 5-nde, Qırımtatar Milliy Meclis reisi Refat Çubarovğa Rusiye akimiyeti işğal etilgen Qırımğa kirmesini yasaqlağanına beş yıl toldı.

Bu aqta Refet Çubarov öz Facebook saifesinde yazdı, dep bildire Qırım. Aqiqat.

“Bugün Rusiye organlarınıñ, işğalci memleketniñ Qırımğa kirişimniñ beş yıllıq “yasağı” yekünlenmekte… Evge barıp, anamnı, tuvğanlarımnı quçaqlamağa mümkün sanki… Amma rusiyeli işğalciler endi azırlandı, “Rusiye devletiniñ anayasa qurumı ve telükesizliginiñ esaslarına qarşı cinayet işlegenim” içün ğıyabiy şekilde apiske mahküm etildim”, – dep yazdı Çubarov.

Onıñ bildirgenine köre, “pis ve çirkin memleket Rusiye adını taşıy”.

“Belki, başqa da ola bile – demokratik, muvafaqiyetli, eyi qomşulı… Amma başta onıñ şimdiki reberleri 2014 senesi fevral ayından berli Ukrainağa qarşı halqara gumanitar uquqınıñ ciddiy bozuvından mesülietli şahıslarnıñ mahkeme taqibi içün Halqara mahkemeniñ skemlesine oturmalı, Rusiyeniñ zulumğa oğrağan bir çoq tamır halqı ise serbest inkişaf aqqını Moskva diktatı tışında yerine ketire”, – dep qoştı Meclis reisi.

2014 senesi iyülniñ 5-nde Çubarov Meclisniñ Herson vilâyetinde keçirilgen toplaşuvından yarımadağa qaytqanda Rusiye quvetçileri kirişini 5 yılğa yasaqlağan edi. Yarımadanıñ memuriy sıñırında Çubarovnı Qırımnıñ o vaqıt Rusiye prokurorı olğan Natalya Poklonskaya qarşıladı. O, “ekstremist faaliyetiniñ yasağına dair” tenbi oqudı, Rusiye sıñırcıları ise Meclis reisiniñ Rusiyege kirişi 5 yılğa yasaqlanğanını bildirdi.

Menba Qırım. Aqiqat
tarih 05.07.2019
kategoriyalar QIRIM
paylaşmaq
UA|TV top haberleri