İşğalciler qırımlılarnıñ işleri boyunca bir sıra makemeler keçirdi

uatv
20.08.2019

İşğal etilgen Aqmescit, Rostov-na-Donu ve Mokva. Bugün rusiye işğalcileri qırımtatarlarnıñ davaları bonca makeme oturışları keçirdi. Moskvanıñ Meşçanskiy rayon makemesi iyülniñ 11-nde tutulğan 7 qırımtatarnı onar biñ rublelik para cezalarını ödemege mecbur etti. O vaqıt Moskva Yuqarı Makemesi yanında 46 faal tevqif etildi. Olar terrorizmde qabaatlanıp, keçken sene umumen 44 yılğa maküm etilgen Zevrі Abseіtov, Remzі Memetov, Ruslan Abіltarov ve Yenver Mamutovğa qol tutmaq içün kelgen edi. Faaller semetdeşlerine qol tutmaq içün, Moskvanıñ yuqarı makemesi yanına “Balalarımız terrorist degil”, “Qırımda repressiyalarnı toqtatıñız” degen plakatlarnen keldi. Adliyeciniñ aytqanına köre, bu areketler başta tutulğanlarnı qabaatlı dep tanımaq, soñra ise para cezaları belgilemek içün rusiye makemesine yetreli oldı.

Rostov-na-Donu şeeriniñ Şimaliy-Kavkaz arbiy makemesi. Mında Aqyarlı Enver Seytosmanov makeme etile. Onı işğalciler terrorizmde qabaatlap, bir yıldan berli Rostov SİZOsında tutalar. Faqat işniñ baqılması tek üç afta evel başlandı. Bugünki oturışuvda Seytosmanovnıñ avdokatlarına söz berilmegen, tek qabaatlav tarafını diñlegenler. Başta prokuror Enver Seytosmanovğa nisbten berilgen tasvirlerni oquğan – zararlı alışqınlıqları yoq, evel cinaiy mesülietlikke celp etilmegen. Soñra tintüv devamında tutıp alınğan kompakt-disk protokolı oqulğan. Anda qayd etilgenine köre, diskte Enverniñ islâm dini aqqında tüşünceleri qayd etilgen. Sanki bu ses yazıları Enverniñ Hizb ut-tahrirge olğan alâqasını tasdıqlay.

Kene de Rostov-na-Donu şeeriniñ şimaliy kavkaz makemesi ve kene de qırımtatarlarğa qarşı uydurılğan terrorizm aqqında dava. Cemaat jurnalisti Nariman Memedeminov keçken sene Bağçasarayda, evinde keçken tintüvden soñ teqif etilip, “Terrorcılıqqa çağıruvlar” maddesi boyunca qabaatlandı. Memedeminovnıñ işini ise makeme bir yıldan soñ, iyunniñ 10-nda baqmağa başladı. Bugünki oturışuvda qabaatlav tarafınıñ şaatını diñlemek kerek ediler, amma makemege şaat kelmedi. Onıñ içün oturışuv avgustnıñ 27-ne qaldırıldı.

Menba UATV
tarih 20.08.2019
kategoriyalar KREML MABÜSLERİ
paylaşmaq
UA|TV top haberleri