İşğal etilgen Qırımda Rusiye quvetçileri tintüvler keçire (VİDEO)

uatv
10.06.2019
Foto Facebook Qırım birdemligi

İşğal etilgen Qırımda Rusiye quvetçileri bir qaç rayonda tintüvler keçire.

Bu aqta “Qırım birdemligi” cemaat birleşmesiniñ faaleri Facebookta haber ete.

Berilgen malümatqa köre, “tahqiqat tedbirleri” Aluştada Eldar Kantemirov, Aluşta rayonınıñ Büyük Lambat (Malıy Mayak) köyünde Ruslan Mesutov, Aqmescit rayonınıñ Mamaq (Stroganovka) köyünde Eskender Suleymanovnıñ (2019 senesi martnıñ 27-nde tutulğan Ruslan Suleymanovnıñ doğmuş qardaşı) evinde keçirilmekte.

Bundan ğayrı daa Riza Ömerovnıñ evinde tintüv keçirilgeni aqqında haber etile: Qarasuvbazar, Mayakovskogo soq., 9, babası Enver Ömerov (Qarasuvbazar, Şevçenko soq., 45/1) ve Aqmescit rayonınıñ Boğurça (Kamenka) qasabasında. Riza Ömerov tutulıp, belli olmağan yerge alıp ketirildi.

Malümatqa köre, Rusiye quvetçileri tintüvden soñ Qırımdaki Rusiye Federal telükesizlik hızmetiniñ bölügine Eskender Suleymanovnı alıp ketti.

Daa soñra belli olğanı kibi, Eldar Kantemirov Aluştadan qayd olğan Şumhay (Zareçnoye) köyüne ketirildi. Şumhay köyü, Predgornaya soq., 17b, Aluşta rayonı adresinde tintüv keçirile.

Bundan ğayrı, Aluştanıñ Körbek (İzobilnoye) köyünde yerli din cemiyetiniñ reisi Lenur Halilovnıñ evinde tintüv keçirilgeni aqqında haber etile.

Menba UATV
tarih 10.06.2019
kategoriyalar QIRIM
paylaşmaq
UA|TV top haberleri