İnsan aqqlarından Avropa makemesi Rusiyeni Edem Bekirovnı tibbiy nezaretten keçirmege vazifelendirdi

uatv
13.07.2019
Foto Facebook Anton Naumliuk

İnsan aqqlarından Avropa makemesi Rusiye ükümetini Aqmescit SİZOsında tutulğan qırımtatar faali Edem Bekirovnıñ mustaqil tibbiy baqınuvını keçirmesine dair qarar çıqardı.

Bu aqta adliyeci Aleksey Ladin bildirdi, dep haber ete Qırım.Aqiqat.

Böyle etip, İnsan aqqlarından Avropa makemesiniñ 2019 senesi iyünniñ 10-nda çıqqan beyanatında Bekirovnıñ sağlıq problemleri boyunca “mustaqil ve tecribeli ekimler” ayrı hulâsalar çıqarmalı, dep aytıla.

“Bu mustaqil tibbiy hulâsalarda al-azırda davacığa kösterilgen tibbiy yardım onıñ sağlıq problemlerine uyğunmı ve apiste tutuv sıñırlav tedbiri olaraq kelişemi dep qayd etilmeli”, – dep aytıla qararda.

Bekirovnıñ adliyecisi, İnsan aqqlarından Avropa makemesiniñ beyanatına esaslanıp, Kreml kontrolindeki Qırım prokuraturası, Aqmescit SİZOsınıñ reberligi ve Bekirov tutulğan tibbiy bölük yolbaşçısına muracaatta bulundı.

“Bekirovnıñ SİZOda tutulması içün mania olğan ükümet cedvelindeki nevrologik hastalığı bar olğanını tahmin etmek içün sebepler bar. Şu sebepten Bekirovnıñ nevropatolog, endokrinolog, hirurg, kardiolog, onkolog ve hirurg-ortoped tarafından baqılmasını acele temin etmege rica etem”, – dep qayd etti Ladin.

Menba Qırım. Aqiqat
tarih 13.07.2019
kategoriyalar KREML MABÜSLERİ
paylaşmaq
UA|TV top haberleri