“Hizb ut-Tahrir davası”: Zevri Abseitov cezahanege etap etilecek

uatv
13.08.2019
Foto Ukrinform-UATV

Birinci Bağçasaray “Hizb ut-Tahrir davası” mabüsi Zevri Abseitov Rostov-na-Donudaki taqiqat tevqifhanesinden cezahanege etap etilecek.

Bu aqta siyasiy mabüsniñ ömür arqadaşı Fatma Abseitova aytıp berdi, dep bildire “Qırım birdemligi”.

Onıñ bildirgenine köre, Kreml mabüsi cezahanege etap etilüv aqqında vesiqalar alğan. Ömür arqadaşları telefonnen laf etkenler, o vaqıt Zevri Abseitov, endi bu afta onı Rusiyeniñ taqiqat tevqifhanesinden çıqaracaqları aqqında aytqan.

“Zevri, oña Moskvadan vesiqa kelgenini ve belki endi bu afta bellisiz yerge etap etilecegini bildirdi. Özüme muqayt olmağa ve balalarnı yahşı terbiyelemege ayttı”, – dedi Fatma Abseitov.

2018 senesi dekabrniñ 24-nde, Rostov-na-Donudaki Şimaliy-Kavkaz bölge arbiy mahkemesi birinci Bağçasaray “Hizb ut-Tahrir davası” mabüslerine, Enver Mamutov, Remzi Memetov, Rustem Abiltarov ve Zevri Abseitovğa üküm çıqardı. Enver Mamutov 17 yıl sert apis cezasına mahküm etildi, Ruslan Abiltarov, Remzi Memetov ve Zevri Abseitov ise 9 yıl sert apis cezasına. Mabüslerden iç birisi qabaatını tanımadı. Olar cinaiy işniñ “siyasiy sebepleri bar”, dep qayd etti.

2016 senesi mayısnıñ 12-de Bağçasarayda Rusiye telükesizlik hadimleri musulmanlar, qırımtatarlarnıñ evlerinde ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorcılıqnen qabaatlanıldı. Olar, Rusiyede terrorcı sayılğan ve yasaq etilgen “Hizb ut-Tahrir” diniy teşkilâtınıñ işinde iştirak etüvnen şübeli sayıla.

Menba UATV
tarih 13.08.2019
kategoriyalar KREML MABÜSLERİ
paylaşmaq
UA|TV top haberleri