“Hizb ut-Tahrir davası”: Marlen Asanov mahsus blokta video nezareti altında buluna

uatv
02.12.2019
Foto Qırım birdemligi

Ekinci Bağçasaray “Hizb ut-Tahrir davası” mabüsi Marlen Asanov Rostov-na-Donu taqiqat tevqifhanesiniñ mahsus blokında gece-kündüz video nezareti altında buluna.

Bu aqta Facebookta “Qırım birdemligi” cemaat birleşmesi bildirdi.

Kreml mabüsiniñ ömür arqadaşı Ayşe Asanova aqayınen qısqa körüşüvge barğan.

“O, mahsus blokta olğanını ayttı – anda video kameraları bar, onı künde 24 saat devamında közeteler. Kamera ölçüleri pek küçük, 2h3 metrlik odaçıq, eki töşek bar ve tar bir boşluq. Künde bir kere olarnı bir saatqa kezmege çıqaralar – uzun divarlı odağa, tavanda 4h4 parmaqlıq bar”, – dep tarif etti Ayşe Asanova.

Onıñ aytqanına köre, ömür arqadaşınıñ sağlıq alı fenalaştı, tiş problemaları peyda oldı. Tiş ekimi ise tedaviylemege razı olmağan, çünki “belli şaraitler olmaq kerek”.

2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı yaqaladı. Olar Rusiyede terrorcı sayılğan ve yasaq etilgen “Hizb ut-Tahrir” teşkilâtınıñ azaları olğanen qabaatlanıla.

Oquñız: ekinci Bağçasaray “Hizb ut-Tahrir davası”nıñ mabüsi Timur İbragimov Aqmescitten Rusiyeniñ Rostov-na-Donu şeerindeki taqiqat tevqifhanesine avuştırılğan soñ ilâcları alındı ve alâ daa qaytarılmadı.

Menba UATV
tarih 02.12.2019
kategoriyalar KREML MABÜSLERİ
paylaşmaq
UA|TV top haberleri