“Hizb ut-Tahrir davası” mabüsi Rustem Abiltarov etap etildi

uatv
08.10.2019
Foto Qırım Birdemligi

Birinci Bağçasaray “Hizb ut-Tahrir davası” mabüsi Rustem Abiltarov Rusiyeniñ Stavropol ülkesindeki 1-nci tüzetüv cezahanesi etap etildi.

Bu aqta “Qırım birdemligi” cemaat birleşmesi öz Facebook saifesinde haber etti.

“Şimdi Abiltarov karantin kamerasında buluna, çünki cezahanege tek bir qaç kün evelsi ketirildi. Bundan evel o başqa yerde edi, amma ne yerde kimse bilmey, ne yaqınlarında, ne advokatında bir malümat yoq”, – yazıla malümatta.

2018 senesi dekabrniñ 24-nde, Rostov-na-Donudaki Şimaliy-Kavkaz bölge arbiy mahkemesi birinci Bağçasaray “Hizb ut-Tahrir davası” mabüslerine, Enver Mamutov, Remzi Memetov, Rustem Abiltarov ve Zevri Abseitovğa üküm çıqardı. Enver Mamutov 17 yıl sert apis cezasına mahküm etildi, Ruslan Abiltarov, Remzi Memetov ve Zevri Abseitov ise 9 yıl sert apis cezasına. Mabüslerden iç birisi qabaatını tanımadı. Olar cinaiy işniñ “siyasiy sebepleri bar”, dep qayd etti.

2016 senesi mayısnıñ 12-de Bağçasarayda Rusiye telükesizlik hadimleri musulmanlar, qırımtatarlarnıñ evlerinde ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorcılıqnen qabaatlanıldı. Olar, Rusiyede terrorcı sayılğan ve yasaq etilgen “Hizb ut-Tahrir” diniy teşkilâtınıñ işinde iştirak etüvnen şübeli sayıla.

HATIRLATAMIZ: Ekinci Aqmescit “Hizb ut-Tahrir davası” mabüsi Cemil Gafarovğa Rostov-na-Donu şeerinin taqiqat tevqifhanesinde ilâclar berilmey.

Menba UATV
tarih 08.10.2019
kategoriyalar KREML MABÜSLERİ
paylaşmaq
UA|TV top haberleri