“Hizb ut-Tahrir davası”: Emir-Üsein Kukunıñ advokatı kartserge qapatılsını temyiz etecek

uatv
15.11.2019
Foto Ukrinform-UATV

Apis cezasına mahküm etilgen Yalta “Hizb ut-Tahrir davası” mabüsi Emir-Üsein Kukunıñ advokatı Sergey Loktev müşterisiniñ kartserge qapatılsını temyiz etecek.

Bu aqta Azatlıq Radiosı haber ete.

“Vaziyet ne olğanını daa butünley bilmeymiz. Şimdi ariza berecekmiz ve tek bundan soñ şikâyet berile bile. Kartserge qapatılması qanunğa binaen ne qadar doğru olmasını bilmek kerek”, – dedi Loktev.

Advokat, Kukunıñ kartserge avuştırılması aqqında resmiy tasdıq alğanınen şikâyet berecek.

Keçenlerde, Rusiyede qanunsız surette 12 yıl sert apis cezasına mahküm etilgen siyasiy mabüs Emir-Üsein Kuku 15 künge karttserge qapatıldı. Qırımtatar aq-uquq qoruyıcısı Rostov taqiqat tevqifhanesindeki kamerada yuqlap qalğan ve aqşamki tizülüvge kelmegen. Onıñ aqqında protokol yazılğan, amma Kuku onı imzalamağan.

Noyabrniñ 12-nde Rostov-na-Donu şeeriniñ Cenübiy bölge arbiy mahkemesi Yalta «Hizb ut-Tahrir dava»nıñ 6 mabüsini sert apis cezasına mahküm etti. Olarnıñ arasında Emir-Üsein Kuku. Olar esassız terrorcılıqnen qabaatlanıldı. Ukraina Tışqı işler nazirligi Rusiyege öz qatıy narazılığını bildirdi ve qanunsız surette mahküm etilgenlerniñ azat etilmesini talap etti. Bu davanıñ iştirakçilerini Amnesty International halqara teşkilâtı “vicdan mabüsleri” dep adlandırdı.

Menba Azatlıq Radiosı
tarih 15.11.2019
kategoriyalar KREML MABÜSLERİ
paylaşmaq
UA|TV top haberleri