“Hizb ut-Tahrir dava” mabüsi Gafarovğa ilâcları berilmey, – advokat

uatv
12.11.2019
Foto Azatlıq Radiosı

Oktâbrniñ 25-den başlap ekinci Aqmescit “Hizb ut-Tahrir dava” mabüsi Cemil Gafarovğa kerekli ilâclar berilmey.

Bu aqta Kreml mabüsiniñ advokatı Rifat Yahin Azatlıq Radiosına aytıp berdi.

“Cemil Gafarovnıñ tuvğanlarından bilgenime köre, taqiqat tevqifhanesinde kerekli ilâclarnen yollanmalar alınmay. Soñki sefer, sağ qalması içün kere olğan “Polisorb” ilâc qabul etilmedi, çünki toz eken”, – dedi advokat.

Onıñ aytqanına köre, taqiqat tevqifhanesiniñ reberligi, toz sıfatında narkotikler berilip ola degen, şunıñ içün ilâclarnı almağa red etkenler.

“Bunıñ ile taqiqat tevqifhanesi şiraitinde tibbiyet sanitar bölügi bu ilâclarnı oña tevsiye etkeni aqqında vesiqalar yoq eken, dep aytlar taqiqat tevqifhanesinde. Amma aynı zamanda Rostov taqiqat tevqifhanesinde eki tiibiy baqınuv olğan edi. Anda bu ilâncnı oña tevsiye ettiler. Ve bu aqta onıñ tibbiyet defterinde yazıla”, – qayd etti Yahin.

Hatırlatamız: Cemil Gafarov üçünci gruppa saqatı, devamlı büyrek ve onen bağlı yürek hastalıqları bar. İlâclarnı qabul etmegenlerinden ğayrı, Gafarovnıñ hastahanege qoymasını da red ettiler.

2019 senesi martnıñ 27-nde Federal telükesizlik hızmeti, Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden “Qırım birdemligi” cemaat birleşmesi faalleriniñ evlerinde kütleviy tintüvler keçirdi. 

Bu dava boyunca 25 qırımtatar qabaatlanıla, 23-yu Rostov-na-Donu, Taganrog ve Şahtı taqiqat tevqifhanelerine çıqarıldı. Raim Ayvazov Aqmescit taqiqat tevqifhanesinde tutula, daa bir kişi – Edem Âyaçikov – ğayıp oldı, bulunğan yeri martnıñ 27-nden berli belli degil.

Menba Azatlıq Radiosı
tarih 12.11.2019
kategoriyalar KREML MABÜSLERİ
paylaşmaq
UA|TV top haberleri