“Evge” filmi Odesa kinofestivaliniñ Grand Prix mukâfatını aldı

uatv
21.07.2019
Facebook Odesa International Film Festival

10-ncı Odesa halqara kinofestivaliniñ Grand Prix mukâfatını, ukrain rejissöri Nariman Aliyevniñ “Evge” filmi ve Levan Akinniñ “Soñra ise oynadıq” gürci levhası aldı.

Bu aqta tedbirniñ Facebook saifesinde haber etile.

10-uncı Odesa halqara kinofestivali çerçivesinde qırımtatar asıllı ukrain rejissörı Nariman Aliyevniñ “Evge” filminiñ ilk kösterilmesi olıp keçti.

Film qırımtatar Mustafa aqqında ikâye ete. Onıñ eki oğlu, Qırımnıñ işğalinden soñ Kyivge köçip ketti. İkâye, onıñ üyken oğlı Nazimnıñ ölüminden başlana. Baba ise kiçik oğlı Alimni evge qaytarmağa, üyken oğlını ise Qırımda, musulman adetlerine köre defin etmege tırışa.

Filmniñ stsenariy müellifleri Nariman Aliyev ve ukrainalı rejissör, stsenarist Marısâ Nikitük oldılar. Baş rollerini Ahtem Seitablayev (“Kiborğı” rejissöri) ve Remzi Bilâlov oynadı. Levha prodüseri Vladimir Yatsenko (“Dıke pole”) oldı, film yapıluvınen ise Limelite kino şirketi oğraştı. Film Ukraina medeniyet nazirliginiñ yardımınen çıqarıldı, onıñ halqara satışınen ise Wild Bunch şirketi oğraşacaq. Film dünyanıñ bir çoq memleketinde, şu cümleden Ukrainada kösterecek.

Daa evel “Evge” filmi Bükreşteki halqara kinofestivalinde eñ eyi film mukâfatını qazandı.

Nariman Aliyev – qırımtatar rejissöri, “Qırım ikâyeleri” trilogiyasınıñ (qısqa film) müellifidir. Onıñ “Sensiz” filmi 66-ncı Berlin kinofestivaliniñ Generation 14+ çerçivesinde taqdim etilgen edi. Öz işlerinde Aliyev qırımtatarlarnıñ qoranta munasebetleri, ananeleri ve turmuşını akis ete.

Kinorejissöri “Qırım ikâyeleri” qısqa filmlerinen ve bu sene Ukrainanı Cannes kinofestivaliniñ “Ayrı bir baqış” programmasında temsil etken ve debüti olğan uzun metrajlı “Evge” filminen belli

Menba UATV
tarih 21.07.2019
kategoriyalar MEDENİYET
paylaşmaq
UA|TV top haberleri