Eki ukrain filmi “Oscar” mukâfatınıñ uzun cedveline kirdi

uatv
10.10.2019
Foto Facebook EVGE

“Oscar” mukâfatınıñ uzun cedveline, Ukraina kino meseleleri Devlet agentligini yardımınen çıqarılğan “Evge” ve “Boyalanğan quş balası” filmler kirdi.

Bu aqta UATV Devlet kinosınıñ matbuat hızmetine atfı etip bildire.

“Amerika kino akademiyası “Halqara uzun film” namzetliginde “Oscar” kino mukâfatınıñ uzun cedveline yayınladı. Ukraina Oscar komiteti tarafından saylanılğan qırımtatar Nariman Aliyevniñ “EVGE” filmi – saylanılğan 93 memleketinden uzun filmler cedvelinde”, – yazıla malümatta.

Bunıñ ile, uzun cedvelge Vatslav Margoulnıñ “Boyalanğan quş balası” ukrain-çeh-slovak-leh filmi kirdi. Devlet kinosı yardımınen çıqarılğan film, Çehiyadan namzet olaraq kösterildi.

Qısqa filmler cedveli 2019 senesi dekabrniñ 16-nda ilân etilecek, namzetler cedveli ise – 2020 senesi yanvarniñ 13-nde.

“Evge” filmi qırımtatar Mustafa aqqında ikâye ete. Onıñ eki oğlu, Qırımnıñ işğalinden soñ Kyivge köçip ketti. İkâye, onıñ üyken oğlı Nazimnıñ ölüminden başlana. Baba ise kiçik oğlı Alimni evge qaytarmağa, üyken oğlını ise Qırımda, musulman adetlerine köre defin etmege tırışa.

Filmniñ stsenariy müellifleri qırımtatar Nariman Aliyev ve ukraina rejissöri, stsenarist Marısâ Nikitük oldı. Baş rollerini Ahtem Seitablayev (“Kiborğı” rejissöri) ve Remzi Bilâlov oynadı. Levha prodüseri Vladimir Yatsenko (“Dıke pole”) oldı, film yapıluvınen ise Limelite kino şirketi oğraştı. Film Ukraina medeniyet nazirliginiñ yardımınen çıqarıldı, onıñ halqara satışınen ise Wild Bunch şirketi oğraşacaq. Film dünyanıñ bir çoq memleketinde, şu cümleden Ukrainada kösterecek.

Daa evel “Evge” filmi Bükreşteki halqara kinofestivalinde eñ eyi film mukâfatını qazandı.

Nariman Aliyev – qırımtatar rejissöri, “Qırım ikâyeleri” trilogiyasınıñ (qısqa film) müellifidir. Onıñ “Sensiz” filmi 66-ncı Berlin kinofestivaliniñ Generation 14+ çerçivesinde taqdim etilgen edi. Öz işlerinde Aliyev qırımtatarlarnıñ qoranta munasebetleri, ananeleri ve turmuşını akis ete.

Kinorejissöri “Qırım ikâyeleri” qısqa filmlerinen ve bu sene Ukrainanı Cannes kinofestivaliniñ “Ayrı bir baqış” programmasında temsil etken ve debüti olğan uzun metrajlı “Evge” filminen belli. 

Menba UATV
tarih 10.10.2019
kategoriyalar CEMİYET
paylaşmaq
UA|TV top haberleri