“Birlik para cezalarından daa degerlidir” marafonu devam ete

uatv
20.08.2019
Foto Qırım Birdemligi

Qırımda “Birlik para cezalarından daa degerlidir” marafonu devam etmekte. Qırım marafunu “Qırım birdemligi” cemiyet birleşmesi tarafından teşkil olundı.

İnsanlar 10 rublelik paralarını çekip, fotolarnen içtimaiy ağlarğa yerleştire.

Marafonğa Türkiyede de qol tuttılar. Qırımtatarlarnen birdemlikni köstermek içün, Türkiye musulmaları, “Birlik para cezalarından daha değerlidir” yazısınen süretlernen içtimaiy ağlarında paylaştı.

Qırımda iyülniñ 11-nde Moskva Yuqarı mahkemesi ögünde kütleviy aktsiyada iştirak etken qırımtatar faalleriniñ cöremelerini ödemek içün «Qırım marafonı» cemaat teşebbüsi çerçivesinde para toplamağa başladılar.

Moskvanıñ Taganskiy rayon mahkemesiniñ qadısı Yuliya Smolina iyülniñ 29-nda Bağçasaraydaki birinci «Hizb ut-Tahrir davasınıñ» mabüslerine qoltutmaq içün iyülniñ 11-nde Rusiye Yuqarı mahkemesi ögünde toplaşqan 18 qırımlığa 20 biñ ruble miqdarında para cezasını berdi. Tutulğanlar umumen 360 biñ rublelik para cezalarını aldı.

20 biñ rublelik para cezası Rustem Tairov, Edem Abdullayev, Aleksandr Gavrikov, Kâzim Useinov, Nariman İbraimov, Zenur Appazov, Eleonor İzmailov, Rustem Celâlov, Osman Hoş, İzzet Sayfulin, Marlen Cemilev, Remzi Beytullayev, Refat Kamilov, Osman Abdurazakov, Marlen Ahayev, Edem Aliyev, Emin Rustemov, Amethan Umerovğa berildi.

Moskvada iyülniñ 11-nde Rusiye politsiyası Bağçasaraydaki birinci «Hizb ut-Tahrir davasınıñ» mabüslerine qoltutmaq içün Rusiye Yuqarı mahkemesiniñ binasına kelgen 45 insannı tuttı. Faallerniñ qollarında yazuvlı şiarlar bar edi: «Qırımda milliy ve diniy sebeplerden repressiyalarnı toqtatıñız», «Qırımda «terrorizm» ile küreş – farqlı fikirlernen küreştir», «Bizim balalarımız terrorist degil» ve ilâhre.

Menba UATV
tarih 20.08.2019
kategoriyalar QIRIM
paylaşmaq
UA|TV top haberleri